Það hefur verið hefð fyrir því að búa til ís fyrir jólin á mínu heimili. Ég fékk uppskriftina hjá mömmu vinkonu minnar þegar ég var krakki og við höfum notað hana allar götur síðan, enda er þessi ís alveg svakalega góður.
Ég gerði þennan ís á dögunum og langar að deila með ykkur uppskriftinni. Ég tók allar myndirnar á Samsung símann minn sem er með mjög góðri myndavél en ég er kannski ekki sú besta í að taka myndir af mat, svo þið bara sýnið því skilning.
Heimagerður rjómaís
4 egg
70 gr sykur
4 dl rjómi
2 tsk vanilludropar
Aðferð:
Byrjið á að stífþeyta eggin og sykurinn.
Það verður aldrei jafn stíft og þegar maður þeytir bara eggjahvíturnar en þetta verður að ljósgulri froðu og lyftist töluvert í skálinni.
Svo þeytir maður rjómann og vanilludropa í annarri skál.
Að því loknu, blandið þá blöndunum saman með sleikju. Þetta þarf að gera mjög varlega í hægum hreyfingum.
Þú getur svo sett hvað sem þú vilt út í ísinn. Í þetta skipti setti ég Oreokex í helminginn og pipar Nóa kropp í hinn. Báðir ísarnir voru mjög góðir og vöktu lukku.
Ég set alltaf ísblönduna í botninn á ísboxinu, svo það sem á að fara út í, ísblöndu og svo koll af kolli. Enda á ísblöndu.
Ég setti smá karamelluíssósu með kexinu í ísinn.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
