Það góða við sumarið er að loksins er hægt að fleygja húfum, treflum og hönskum inn í skáp og skreyta sig með fallegum fylgihlutum í staðinn og leyfa þeim að njóta sín. Tískan í fylgihlutaflórunni er fjölbreytt í sumar og þess vegna ættu allir að eiga auðvelt með að finna eitthvað við sitt hæfi. Hattar, hálsmen, eyrnalokkar, hárbönd og hringir – fallegir fylgihlutir setja oft punktinn yfir i-ið hvað heildarútlitið varðar.
Hárbönd hafa verið áberandi á tískupöllunum í allskonar útfærslum. Það getur líka verið voðalega þægilegt að notast við hárband þegar ekki er nenna til þess að leggja mikinn metnað í hárgreiðsluna. Hippatískan virðist einnig alltaf gera aðeins vart við sig með hækkandi sól. Þess vegna eru hvers kyns blómahárbönd og spangir oft vinsælir fylgihlutir á sumrin.
Bee Shaffer, dóttir Anna Wintour ritstjóra tískutímaritsins Vogue, var með einfalt band á höfðinu á Met Gala samkomunni í byrjun maí.
Hattar hafa verið vinsæll fylgihlutur undanfarin sumur og eru vinsældir þeirra ekkert að dvína ef marka má helstu tískuverslanir. Flottur hattur getur líka bjargað slæmum hárdegi hratt og örugglega.
Derhúfur gefa höttunum ekkert eftir. Leðurderhúfur eru vinsælar sem og hefðbundnar íþróttaderhúfur.
Bönd um hálsinn og hin svokölluðu mellubönd (choker) eru það heitasta um þessar mundir og ómissandi fyrir sumarið.
Birtist fyrst í …amk fylgiblaði Fréttatímans.
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
