Saga Nazari er 22 ára stelpa sem ólst upp við mikið ofbeldi. Móðir hennar eignaðist hana aðeins 17 ára með fyrstu ástinni sinni en hann er mun eldri og strangtrúaður múslimi. Saga bjó ásamt foreldrum sínum í Noregi fyrstu ár ævi sinnar og flökkuðu þær mæðgur á milli kvennaathvarfa á flótta undan ofbeldi föður Sögu. Ofbeldið sem Saga horfði upp á og afleiðingarnar hafa haft mikil áhrif á líf hennar. 

Saga þróaði með sér fíknisjúkdóm en hefur verið án hugbreytandi efna í tæp fjögur ár. 

Sjá einnig: Eina stúlkan í heiminum með „Benjamin Button sjúkdóminn“

Neyslusaga Sögu hófst þegar hún var aðeins 13 ára gömul. “Ég var með fjölskyldunni á gjörgæslunni þar sem 8 ára gömul frænka mín var tekin úr sambandi og dó. Það var mikið áfall að sjá hana skipta um lit og breytast þegar hún var dáin.” Segir Saga um undanfara þess að hún drakk í fyrsta skipti. Hún segir okkur frá huglægu þráhyggjunni sem kom í raun strax án þess að nokkur gerði sér grein fyrir og varð neyslan stjórnlaus frá fyrsta degi, ef svo má að orði komast. 

Áföll í lífi Sögu eru ótal mörg og var hún á flótta undan tilfinningum sínum og notaði hún hugbreytandi efni daglega í mörg ár. Hún segir okkur frá atviki í lífi sínu frá því hún var unglingur og einu af því skiptum sem henni var birlað ólyfjan.  

“Ég rankaði við mér í fangaklefa, vissi ekki neitt og mundi ekkert.” Hún segir okkur frá því hvernig einangrun í þessum klefa hafði áhrif á hana, hún gerði tilraun til að enda líf sitt þar auk þess að upplifa algjört vonleysi en hún var undir lögaldri á þessum tíma og hennar réttur ekki virtur.

“Ég er ekki að tala illa um lögregluna almennt en þarna var brotið á mér.” 

Sjá einnig: Fíknin verður sterkari er móðurástin

Saga gerði tilraun til að vera venjuleg og gera hluti sem venjulegt fólk gerir en fannst hún ekki passa inn og fannst hreinlega ekki gaman.

Aðeins 19 ára gömul var Saga komin á götuna, hún er móður sinni afar þakklát í dag fyrir að hafa tekið þá erfiðu ákvörðun að vísa henni út því það varð til þess að Saga þurfti að horfast fyrr í augu við sjúkdóminn sem hún berst við, fíknisjúkdóm.

Saga Nazari er mögnuð ung kona sem er opin, einlæg og segir söguna sína á hjartnæman og skemmtilegan hátt.

Við mælum með að hlusta.

SHARE