Bjartmar Leósson, sem er betur þekktur sem hjólahvíslarinn, er nýjasti viðmælandi hlaðvarpsins Það er von. Hann er hvorki með fíknisjúkdóm né aðstandandi en hefur á sinn einstaka hátt nálgast okkar jaðarsettasta fólk á jafningjagrundvelli í gegnum samtöl í stað þess að finna sökudólga og vilja refsa þeim fyrir að taka reiðhjól og annað slíkt ófrjálsri hendi.

Bjartmar fór að taka eftir mikilli umferð stolinna hjóla í miðbænum fyrir töluvert löngu síðan og talar hann um að það séu oftar en ekki okkar veikustu bræður og systur í samfélaginu sem eru að bjarga sér.

„Eins og einn maður sagði við mig, við erum ekki vont fólk, við erum veikt fólk. Þetta er mér mjög hugleikið og hefur opnað augu mín fyrir ákveðinni stöðu ákveðins hóps og ég velti fyrir mér hvort það mætti ekki gera margt öðruvísi og betur fyrir þennan hóp,“ segir Bjartmar. Fyrir tveimur árum gat Bjartmar ekki horft lengur upp á reiðhjól safnast saman fyrir framan ákveðna staði í bænum og tók málin í sínar hendur. 

„Þarna voru t.d. racer-ar tilbúnir í Wow cyclothon upp á minnst 300 þúsund, ég sá lögguna keyra framhjá og fólk labba en enginn gerði neitt,“ segir hann og bætir við að lögreglan hafi varað hann við því að hefja þetta verkefni, að ná til baka stolnum hjólum fyrir fólk því fólk gæti verið í annarlegu ástandi og jafnvel beitt hann ofbeldi. 

„Ég lét það sem vind um eyru þjóta,“ segir Bjartmar um ráðleggingar lögreglu. Við ræðum um umburðarlyndi sem Bjartmar miðlar áfram til fólks sem hann skilar hjólum til og einnig um fíkniefnasala sem eru hættir að vilja taka við hjólum fyrir efni. Í gegnum þetta gæluverkefni hefur Bjartmar séð menn ná undraverðum bata. Sem dæmi nefnir hann mann sem hann kynntist og gneistaði á milli þeirra í upphafi, þar sem maðurinn réðst að honum en með því að nálgast hann á persónulegum nótum og jafningjagrundvelli náði Bjartmar í gegn.„Það er þarna sem maður lærir, þetta er það stærsta sem ég hef upplifað í gegnum þetta. Pabbi þessa stráks var búinn að hringja í prest því það sá enginn að það væri leið út en hann er edrú í dag.“

Við ræddum um úrbætur, hvernig mætti bæta kerfið fyrir veikasta fólkið okkar, það þurfi að aðstoða fólk og færa aðstoðina innan kerfisins. Hann vinnur á leikskóla á daginn og notar frítíma sinn í að finna stolin hjól fyrir fólk og tengjast jaðarsettasta fólkinu okkar. Bjartmar er einstakur maður með hjartað á réttum stað.

SHARE