Gunnar Reykfjörð er 55 ára gamall faðir sem hefur verið í bata frá fíknisjúkdómi í fjögur ár. Gunnar ólst upp við alkóhólisma fram til 13 ára aldurs en þá fór faðir hans í meðferð og hætti drykkju. „Ég þurfti töluvert fleiri tilraunir en hann til að hætta,“ segir Gunnar.

Allt frá barnsaldri upplifði Gunnar mikla skömm varðandi sjúkdóminn og rifjar hann upp að hafa falið AA bók föður síns fyrir vinum sínum í stað þess að fagna batanum svo skömmin hvarf ekki þrátt fyrir að neyslan hafi hætt á heimilinu.

Á fjórtánda ári, drakk Gunnar áfengi í fyrsta skipti, hann man vímuna og segist hafa orðið alkóhólisti strax þarna.

„Ég gat varla staðið upp en hafði þó vit á að koma mér heim og ældi í hvern garð á leiðinni. Ég ætlaði að láta sem ekkert væri þegar ég kom heim og bauð mömmu góða kvöldið nokkrum sinnum, ætlaði að láta mig sunka í sófann en rak þá höfuðið í gluggakistu og rotaðist.“

Eftir þetta kvöld kom Gunnar ekki niður víni þrátt fyrir ítrekaðar tilraunir, hann þráði vímuna en kom því ekki niður fyrr en um 15 ára aldur. 18 ára varð hann ástfanginn, eignaðist barn og fór að fela drykkjuna. 

Alkóhólisminn þróast og eftir að Gunnar flytur til Bandaríkjanna kynnist hann nýjum vímuefnum sem ekki voru til á Íslandi í þá daga. „Efnin voru himnasending, ég fann ekki til,“ segir Gunnar um sín fyrstu kynni af nýju vímuefnunum í Bandaríkjunum. Eitt leiddi af öðru og áður en hann vissi af var fíknin búin að taka öll völd. 

„Læknar komust að því síðar að ég hafi orðið fyrir taugaskemmdum í fyrsta skipti sem ég reykti krakk.“

Gunnar lifði tvöföldu lífi, vann við að keyra út fisk á nóttunni og neytti hugbreytandi efna á daginn. Neyslan varð þannig að hún kom í veg fyrir að hann tæki við stöðuhækkun því þá myndi vinnan trufla neysluna. 

Gunnar segir okkur frá því hvernig neyslan þróaðist og hann missti stjórnina: „Einn daginn er mér sagt að það væri ekki til neitt kókaín og ég kynntur fyrir manni í jakkafötum með regnhlíf. Þar keypti ég mér heróín í fyrsta skipti.“

25 ára gamall kom hann heim og fór í meðferð. Stuttu síðar í partýi komst Gunnar í kynni við sprautur. „Ég var fullur og sagði, sullaðu í eina fyrir mig.“

Það verður vendipunktur í lífi Gunnars þegar hann fær að fara til móður sinnar en hún hefur alltaf haft trú á að hann muni ná bata á endanum.

Gunnar kynntist konu, þegar hann var búinn að vera edrú í ár, sú kona var skilin á borði og sæng. Eina örlagaríka nótt var konan myrt í svefni, sá sem framdi morðið var fyrrverandi eiginmaður hennar en hann endaði líf sitt einnig. Gunnar var settur á róandi lyf eftir þetta stóra áfall en á endanum varð til þess að hann varð edrú. 

Gunnar Reykfjörð á magnaða og stóra sögu. Hann deilir henni með okkur, áföllum og sigrum.

Við mælum með að hlusta.

SHARE