Harpa Diego er mögnuð kona sem gengið hefur hlykkjóttan veg í gegnum lífið en alltaf stendur hún upprétt og setur upp bros. Harpa er nýjasti viðmælandi hlaðvarpsins Það er von, þar segir hún okkur sögu sína sem helst líkist bíómyndahandriti, myndu sumir segja. Harpa Diego átti góða æsku og var mikil pabbastelpa, hún var mikið hjá föðurömmu sinni og fékk gamaldags uppeldi og trúarlegt eins og hún orðar það. Þegar Harpa var aðeins 11 ára gömul lenti hún í nauðgun, fyrsta stóra áfallið sem breytti öllu í hennar lífi. „Þetta var leyndarmálið mitt og ég sagði engum frá.“

Harpa flutti til ömmu sinnar eftir þetta og leitaði huggunar í mat. Hún talar um að hafa orðið feitasti unglingurinn í skólanum, fundist hún ógeðsleg og einungis viljað vera með ömmu sinni og eldra fólki sem var gestkomandi á heimili þeirra. Harpa byrjaði seint í neyslu hugbreytandi efna en áfengisneysla hennar hófst um 28 ára aldur, fram að því var hún fyrirmyndarhúsmóðir með þrjú börn og gift æskuástinni. „Hann var alkóhólisti sem byrjaði að drekka mikið eftir vinnuslys og þá byrjaði ofbeldi líka. Ég ákvað einn daginn að prófa að drekka með honum, þá horfði ég í spegil í fyrsta skipti og hugsaði með mér að ég væri kannski svolítið sæt,“ segir Harpa.

Sjá einnig: Aftur á spítalann í aðra aðgerð

Á einu ári, eftir skilnað, fór Harpa úr því að vera þessi fyrirmyndarhúsmóðir í það að missa börnin frá sér og bakkus átti hana. „Bakkus var stóra ástin í lífi mínu.“

Hún hafði farið einu sinni á Vog en fallið stuttu eftir það. Eftir að hafa misst frá sér börnin reyndi Harpa nokkur sjálfsvíg og segir Guð vaka yfir sér. Hún rifjar upp með okkur: „Ég man alltaf eftir því þegar það var verið að berja mig, þá tuggði ég 23. Davíðssálm í huganum.  Leiðin lá beint niður á við, hún fór í harða neyslu, vændi, stundaði erótískt nudd og lenti í hræðilegum áföllum. 

Harpa tók mikla meðvirkni með sér út í lífið og kunni illa að setja fólki mörk. „Eftir eina meðferð flutti ég á Dyngjuna og í fór í AA, þar varð ég ástfangin. Það leið ekki á löngu þar til hún flutti til mannsins þrátt fyrir andstæðar ráðleggingar forstöðukonu Dyngjunnar og féllu þau í djúpa neyslu stuttu síðar á heimili hans. Harpa segir okkur frá því hvernig neyslan þróaðist eftir þetta: „Hann kom einn daginn með poka af sprautum úr apótekinu og fór að sprauta sig, ég bað hann að sprauta mig líka. Þessi maður beitti mig miklu líkamlegu ofbeldi og vaknaði ég þrisvar í öndunarvél eftir árásir af hans hálfu og vart hugað líf, í hvert skipti sat pabbi hjá mér.“

Sjá einnig: 6 leiðir til að láta heimilið ilma vel

Harpa reyndi við nokkrar meðferðir á þessum árum en það gekk brösuglega, hún segir frá ófáum augnablikum sem eru grátbrosleg en hún var ofurseld hugbreytandi efnum og stoppaði ekki þrátt fyrir að liggja fyrir dauðanum.

Hún segir frá atvikum þar sem hún býr með manni á gististiheimili í Reykjavík. „Þarna er mér byrlað ólyfjan, ég fór að slefa og þá var ég tjóðruð upp. Ég sá hann svo taka við peningum frá venjulegum mönnum í jakkafötum. Þarna var mér misþyrmt, þeir gerðu við mig það sem þeim þóknast, jafnvel lamin. Stundum var einn, stundum tveir menn og einu sinni þrír. Ég var alltaf bundin. Ég var svo skilin eftir, bundin og blóðlaus í höndum. Ég þurfti að míga og skíta á mig, þetta var það langur tími, meðan hann fór að djamma fyrir peninginn”.

Líf Hörpu hefur einkennst af stórum áföllum en hún náði sjálf 11 ára edrúmennsku, á þeim tíma bjó hún í 10 mánuði með son sinn í Kvennaathvarfinu. 

Hún féll eftir 11 ár. „Eftir tvær til þrjár helgar var ég komin í leigubíl í apótek að kaupa sprautur og komin á sama stað, þetta fall var í 14 mánuði.“

Sjá einnig: Móðir fann upp á leið til að láta börnin hætta að slást

Þessi kona er hetja, hún hefur helgað líf sitt því að hjálpa öðrum sem þjást af fíknisjúkdómi. Hún hefur í sínu starfi komið að nokkrum einstaklingum sem látist hafa á áfangaheimi sem hún starfar á.

Við mælum með að hlusta á sögu þessarar frábæru konu, í heild, sem stendur bein í baki, þrátt fyrir allt.

SHARE