Þessi kaka er svolítið óvenjuleg og alveg dásamlega góð. Alveg ekta sunnudags. Uppskriftin er fengin af blogginu hennar Tinnu Bjargar, sem er eitt af mínum uppáhalds. Ég mæli með því að þú fylgist með Tinnu á Facebook og fáir allar gómsætu uppskriftirnar hennar beint í æð.
Sjá einnig: Amerísk ostakaka með bláberjum
Karamellujógúrtkaka
Botn
1 pakki Tom & Jerry kex
70 g brætt smjör
Fínmalið Tom & Jerry kex í matvinnsluvél og blandið saman við brætt smjör. Klæðið botninn í litlu hringlaga smelluformi (20 cm) með plastfilmu. Þrýstið kexblöndunni jafnt og þétt ofan í smelluformið og frystið kökubotninn í um 20 mínútur. Leysið kexbotninn úr forminu og fjarlægið plastfilmuna. Spreyið því næst hliðar smelluformsins með örlitlu Pam spreyi. Þannig losnar jógúrtkakan auðveldlega úr forminu síðar. Að lokum er kexbotninn aftur settur varlega í smelluformið.
Jógúrtfylling
500 ml Þykkmjólk með karamellubragði
300 ml þeyttur rjómi
4 matarlímsblöð
50 ml rjómi
Blandið þykkmjólk og þeyttum rjóma varlega saman. Leggið matarlímsblöð í vatnsbleyti þar til þau mýkjast og kreistið síðan úr þeim vatnið. Hitið rjóma að suðu, bræðið matarlímsblöðin saman við og kælið svolítið. Hellið matarlímsblöndunni í mjórri bunu út í jógúrtblönduna og hrærið stanslaust á meðan til að koma í veg fyrir að límkekkir myndist.
Hellið jógúrtfyllingunni ofan í smelluformið og kælið kökuna í að minnsta kosti 5 klukkustundir. Best er að geyma hana í kæli yfir nótt. Leysið karamellujógúrtkökuna varlega úr smelluforminu og setjið hana á kökudisk.
Karamellubráð
20 karamellur frá Freyju
30 ml rjómi
Bræðið karamellur og rjóma saman og kælið að stofuhita. Hellið karamellubráðinni yfir jógúrtkökuna og látið leka svolítið niður með hliðunum.
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
