Engan skyldi þó undra þó auglýsingin, sem má sjá hér að neðan, hafi vakið heift, hneykslan, reiði og jafnvel fyrirlitningu þeirra sem greina hvað glaðlynda konan í litríka kjólnum er í raun að gera meðan hún dansar glaðlyndislega og flissar framan í spegilinn.

Auglýsingin, sem er ætlað að heiðra Mæðradaginn sem brátt rennur upp, er spænsk að uppruna og var upphaflega hugsuð sem skörp ádeila á stranga löggjöf um fóstureyðingar á Spáni með þeim tvíræða árangri að gripið var til ritskoðunar fljótlega eftir birtingu hennar, þar sem svæsnasta atriði í þessari 20 sekúndna paródíu var klippt út. Svo mikla hneykslun almennings hefur auglýsingin vakið að spænsk yfirvöld hafa jafnvel íhugað að sækja lögbann á ungu konuna í litríka kjólnum með öllu. 

En hvað er svona svakalegt við 20 sekúnda klippu af ungri og glaðlyndri konu í litríkum sumarkjól? Jú, auglýsingin hefst á dansi ungu konunnar, sem flissar fjörlega fyrir framan spegil. Því næst grípur hún í stóra, uppblásna blöðru sem hún treður með heiftarlegum og merkilega öflugum tilburðum undir fallegan sumarkjólinn (þetta er sumsé tákngerving þeirrar þrá konunnar að eignast barn; verða móðir).

Því næst stígur fallega, unga konan hömlulaus (og hálf vitstola) gleðispor fyrir framan spegilinn (til heiðurs Mæðradeginum, því hún þráir jú að verða móðir) og nú kemur það; tryllingur ungu konunnar í fagurleita sumarkjólnum nær hámarki þegar hún dregur upp smokkapakka, læðir fram hvassri nál og STINGUR GAT á hvern einasta smokk sem er að finna í pakkanum.

Er hér kominn einn ógeðfelldasti óður til Mæðradagsins sem sögur fara af? 

[youtube width=”600″ height=”320″ video_id=”cYOAWXeH6QI”]

SHARE