Hið fullkomna sumarfrí, frábær kærasti sem kemur færandi hendi með rósir, guðdómlegar máltíðir og ótrúleg afrek á sviði útivistar og íþrótta. Gullfalleg börn, gleðilegar fregnir og gallharðir stuðningsmenn. 

Ef lífið væri jafn réttlátt, gott og undursamlega einfalt í eðli sínu og stöðuuppfærslur vina og kunningja vilja oft meina, þá væru sennilega engin stríð háð í heiminum, aukakíló heyrðu sögunni til og uppeldi barna væri leikur einn.

Allt virðist svo auðvelt á Facebook. En er það svo í raun og veru? Getur verið að við staðreyndir tali ekki alltaf sínu máli? Skreytir fólk sannleikann? Í þessari fáránlegu en hárbeittu stuttmynd frá Higton Brothers er farið ofan í saumana á sannleikanum að baki hinum “hamingjusömu stöðuuppfærslum” sem eflaust fara í taugarnar á einhverjum:

 

[youtube width=”600″ height=”320″ video_id=”QxVZYiJKl1Y”]

 

Næst þegar ótrúlega stöðuuppfærslu ber fyrir augu þín á Facebook, hafðu þá hugfast að allir slípa sannleikann til þegar að samskiptamiðlum kemur og þeir eru fáir sem leka bláköldum staðreyndum um gráleitan hversdagleikann út á netið – nema ef vera skyldi þegar bregður út af vananum.

Facebook er skemmtilegur leikvöllur en þar takast líka egóin á um líflegustu og litríkustu augnablikin, sem vert er að festa á filmu. Bróðurpartur hversdagsleikans kemst hins vegar aldrei á blað og allir glíma við einhver verkefni sem ekki eru jafn spennandi og látið er í ljós skína á opinberum vettvangi.

Samkiptamiðlar eru skemmtileg tól, en það er kúnst að kunna að sleppa tökunum og grípa lífið eins og það kemur okkur fyrir sjónir í einrúmi. Fangaðu augnablikið og umfaðmaðu einfeldnina sem fólgin er í daglegu lífi – í stað þess að agnúast út í montið sem lesa má í formi stöðuuppfærslna á netinu. Það er dásamlegt frelsi fólgið í því einu að sleppa.

SHARE