Ivanka Trump, athafnakona, fyrrum ofurfyrirsætan og dóttir milljarðamæringsins Donald Trump, sat fyrir í tímaritinu Fit Pregnancy þegar hún var komin 6 mánuði á leið. Hún á von á sínu öðru barni með eiginmanninum Jared Kushner en fyrir eiga þau hina tveggja ára gömlu Anabellu.

Ivanka talaði um mataræði sitt á meðgöngu og segist drekka eitt glas af vatni með sítrónu á hverjum morgni. Hún segir að það að eiga smábarn hjálpi henni að halda mataræðinu í lagi. „Þegar maður er með lítið barn á maður alltaf hollan mat í ísskápnum.“

Í morgunmat fær hún sér grískt jógúrt eða kotasælu með bláberjum eða trönuberjum og morgunkorni.

Þegar kemur að líkamsrækt á meðgöngu segist hún reyna að gera allt sem hjálpar henni að slaka á. Hún segist ekki stunda brennsluæfingar á meðgöngunni og kýs frekar að gera slökunaræfingar eða jóga.

Vonar að hún verði jafn heppin í þessari fæðingu
Nú eru tvær vikur í áætlaðan fæðingardag og Ivanka segist vona að næsta fæðing verði jafn auðveld og sú fyrsta: „Ég var heppin í fæðingu dóttur minnar, ég byrjaði að fá hríðar og hún fæddist innan tveggja tíma. Ég er viss um að ég verð ekki jafn heppin í þetta sinn en ég vona það!“

SHARE