Stundum eyði ég óþarflega miklum tíma í vitleysu. Eins og til dæmis í hangs á Google. Annað veifið slæ ég inn setningar á borð við things to make with red wineEða Gordon Ramsay nakedLeitin að því síðarnefnda hefur enn ekki borið neinn árangur. Því miður. Google færir mér hins vegar oft á tíðum hugmyndir að því hvernig ég get sullað með rauðvín. Öðruvísi en að hella því bara í mig.

Það er fimbulkuldi úti þessa dagana. Í slíkri veðráttu er voðalega gott að svolgra í sig bolla af heitu súkkulaði við og við. Ennþá betra ef umrætt súkkulaði er með rauðvínsívafi. Ekki? Jú, ég get svo guðsvarið fyrir það. Miklu betra. Manni hlýnar líka talsvert hraðar. Sem er plús. Og verður aldrei kalt aftur. Aldrei.

Nei, ókei. Nú er ég að ljúga. En súkkulaðið heita er ótrúlega gott. Lofa.

Svo eru líka páskar. Þá má nú alveg njóta.

Sjá einnig: Gamaldags súkkulaðiterta með alvöru súkkulaðiglassúr

IMG_8953

IMG_8913

IMG_8917

Heitt súkkulaði með rauðvínsívafi

1 og 1/2 bolli nýmjólk

lengjur suðusúkkulaði

lengur rjómasúkkulaði

1 bolli rauðvín

1 dós Coconut Cream

kanill á hnífsoddi

(uppskriftin dugir í 3-4 bolla)

IMG_8927

Hellið mjólk í pott. Brjótið tvær lengjur af báðum súkkulaðistykkjunum. Sem sagt átta bita af hvoru. Fleygið þeim í pottinn. Látið malla við góðan hita þar til súkkulaðið bráðnar.

IMG_8939

Hellið rauðvíninu saman við. Hrærið vel og vandlega. Þetta á að vera heitt en ekki að sjóða. Ó, lyktin á þessum tímapunkti. Hreinn unaður. Mmm.

IMG_8933

Kókosrjóminn er ómissandi með þessum bolla. Ég tæmi dósina í stóra skál og píska innihaldið þar til það er orðið sæmilega þykkt og rjómakennt.

IMG_8951

Hella súkkulaðinu í bolla. Toppa með kókosrjóma. Dusta dálítið af kanil yfir herlegheitin. Njóta.

IMG_8955

Næstum jafn gott og að finna nektarmyndir af Gordon Ramsay. Bara næstum.

Sjá einnig: Alvöru heitt súkkulaði með kókosmjólk – Uppskrift

SHARE