Hélt því leyndu að hún ætti von á barni með hjálp staðgöngumóður

Grey´s Anatomy leikkonan Ellen Pompeo og eiginmaðurinn hennar Chris Ivery eignuðust sitt annað barn fyrir tveimur mánuðum með hjálp staðgöngumóður. Hjónin náðu að halda þessu leyndu alla meðgönguna og tveim mánuðum betur en síðan ákvað Ellen að deila því á Twitter síðu sinni síðastliðinn fimmtudag. Ellen og Chris eignuðust stúlku sem fékk nafnið Sienna May Ivery en fyrir eiga þau dótturina Stella Luna sem fæddist árið 2009.

Leikkonan mætti síðan í viðtal til Jimmy Kimmel sama dag og hún setti inn myndina af Siennu inn og sagði að henni hafi þótt mjög mikilvægt að halda þessu leyndu allan þennan tíma til að vernda staðgöngumóðurina. Ellen tjáði einnig Kimmel að henni þætti bara gaman að halda svona hlutum leyndu frá slúðurheiminum og að þetta hafi ekki verið í fyrsta skipti sem hún náði því. Þegar Ellen og Chris fengu borgarstjóra New York til að gifta sig náðu þau að halda því leyndu. Það var ekki fyrr en fimm dögum eftir brúðkaupið sem að slúðurtímaritin komust á snoðir um brúðkaupið.

Ellen er mikið í fjölmiðlum þessa stundina en fjölskyldan hennar prýðir meðal annars forsíðu Architectural Digest í þessum mánuði. Ellen býr ásamt Chris og stúlkunum sínum í fallegu húsi í Los Angeles en í blaðinu má sjá húsið fyrir og eftir breytingar sem voru gerðar á því þegar leikkonan flutti í húsið.