“Við verslum hér af því okkur finnst þetta þægilegt og þetta klárast alltaf áður en næsta sending kemur,” segir ánægður viðskiptavinur Græna hlekksins sem rekur markaðinn Bændur í bænum á Ártúnsholtinu og netverslunina graenihlekkurinn.is. Þar er að finna úrval lífrænna matvæla beint frá bónda.
Græni hlekkurinn er sölu- og dreifingarfyrirtæki með lífrænar afurðir sem selur fyrst og fremst afurðir beint frá íslenskum framleiðendum ásamt því að flytja inn lífrænar vörur frá hollensku fyrirtæki. Í netversluninni getur fólk annaðhvort skráð sig í áskrift eða verslað eftir þörfum.
Grænmeti í áskrift gefur fólki kost á að panta það sem er til hverju sinni einu sinni í viku og nálgast síðan vöruna sjálft vikulega. Um þrjá afhendingarstaði er að ræða: Bændamarkaðinn í Nethyl Ártúnsholti, Olís Gullinbrú eða Olís Selfossi. Allt eftir hentugleika hvers og eins. Græni hlekkurinn sendir líka hvert á land sem er þannig að þjónustan er ekki síður fyrir fólk búsett á landsbyggðinni, sem getur með þessu móti fengið glænýja og ferska lífræna vöru beint frá bónda án allrar fyrirhafnar.
Ljósmynd: Sölufélag garðyrkjumanna.
Þóra er keramikhönnuður og starfar sem slíkur á vinnustofu sinni í Hafnarfirði ásamt pistlaskrifum og kennslu. Þóra reynir að tileinka sér umhverfisvæna mannasiði á sem flestum sviðum og notar t.d. sem náttúrulegust hráefni í hönnun sína. Hún hefur tekið þátt í fjölda sýninga bæði hér heima og ytra ásamt því að hafa komið að rekstri tengdum heilsu og hönnun.
