Ég á þrjú börn og eins og með börn almennt er misjafnt hvað þeim finnst vera besti mömmumaturinn og það er svo misjafnt hvað þeim finnst best á hverjum aldri fyrir sig!
Frumburðurinn minn er 30 ára, já ég trúi því ekki sjálf enda bara 25 ára í hjarta 🙂
Hann elskar þennan pottrétt sem við í fjölskyldunni köllum Rússnesska kássu!
Uppskrift:
700 gr lamba- eða nautagúllas
1 lítil dós maísbaunir
4 gulrætur
5 kartöflur
Gul,rauð og græn paprika ein af hverjum lit
100 gr beikonkurl
Lítil dós ananaskurl
3 msk tómatpúrra
2 laukar
Karrý salt og pipar
1-2 dl vatn
Olía eða smjör til steikingar
Aðferð:
Byrja á því að brúna gúllasið og beikonkurlið í potti með olíu eða smjöri, þegar kjöt er brúnað bæti ég við smáttsöxuðum lauknum og krydda með karrý (ég krydda vel).
Rest sett út í og kryddað til með salti og pipar látið malla í alveg 40 mín.
Rosalega gott að bera fram með heimatilbúinni kartöflumús og eða snittubrauði.
Má gjarnan leika sér með að setja allskyns grænmeti útí réttinn.
Verði ykkur að góðu, ég vona að frumburðurinn sjái þessa uppskrift: Þá getur hann bara eldað þetta sjálfur. 🙂
Kristín fæddist á nunnuspítala og var skírð á flugvelli í henni Ameríku.
Hún er gift og á þrjú börn og eitt barnabarn. Hún hefur að mestum hlut unnið við að efla fólk og hefur menntað sig á því sviði. Ásamt því að skrifa á hun.is vinnur hún sjálfstætt sem meðferðaraðili.
Elskar að lesa, skrifa og mála en útivist og andleg málefni heilla hana.
Hún skrifar út frá eigin reynslu, faglegu nótunum og kaldhæðnislega um upplifun sína af breytingarskeiði miðaldra kvenna. Með hækkandi aldri hefur hún lært að létta sér lífið sem húsmóðir og gera mat á einfaldan hátt en alveg afbragðsgóðan svo frá henni má sjá uppskriftir að ýmsu góðgæti.
Hennar mottó er jákvæðni út í kosmósið því hún hefur lært af lífinu að jákvæðni kemur manni ansi langt!
