Hérna fáum við enn einn gullmolann af blogginu hennar Tinnu Bjargar. Þessi terta er einstaklega ljúffeng. Algjört hnossgæti. Enda inniheldur hún Snickers, sem hefur þá eiginleika að breyta vatni í vín. Eða svo gott sem – þið vitið.

IMG_5011

Snickers marengs með ástaraldin

Marengsbotnar

4 eggjahvítur

3 dl sykur

3 bollar Rice Krispies

  • Þeytið eggjahvítur í skál þar til þær verða stífar og ekki lengur froðukenndar. Bætið við sykri og stífþeytið. Blandið því næst Rice Krispies varlega saman við blönduna. Teiknið með blýanti hring á sitthvora bökunarpappírsörkina. Gott er að nota botninn úr 20 eða 24 cm kökuformi til að teikna eftir. Skiptið marengsblöndunni jafnt á bökunarpappírsarkirnar og smyrjið þannig að hún fylli upp í teiknuðu hringina.
  • Bakið marengsbotnana við 120° í 60 mínútur.

Rjómablanda

400 ml þeyttur rjómi

250 gr jarðarber

3 ástaraldin

100 gr Snickers

  • Skerið jarðarber í litla bita, skerið ástaraldin í tvennt og skafið innan úr þeim með skeið. Saxið Snickers í litla bita og blandið saman við þeyttan rjóma ásamt jarðarberjum og innihaldi ástaraldinanna.
  • Hvolfið öðrum marengsbotninum á fallegan kökudisk og smyrjið rjómablöndu jafnt yfir. Leggið svo hinn botninn ofan á.

Snickers-krem

200 gr Snickers

40 gr suðusúkkulaði

50 gr smjör

4 eggjarauður

60 gr flórsykur

  • Skerið Snickers í bita og bræðið í potti ásamt suðusúkkulaði og smjöri. Kælið blönduna í 10-15 mínútur. Þeytið eggjarauður þar til þær verða léttar og ljósar og bætið flórsykri smátt og smátt saman við. Þegar blandan hefur þykknað, bætið súkkulaðiblöndu saman við og þeytið í 2-3 mínútur.
  • Hellið kreminu jafnt yfir marengstertuna og skreytið tertuna að vild.

IMG_5015

Tengdar greinar:

Hitaeiningabomba – Epla og snickers salat – Uppskrift

Dásamleg Snickerskaka – Uppskrift

Heimatilbúnir Snickers bitar – Uppskrift

SHARE