Anne Mette Hjortshøj er keramiker sem býr og starfar á Bornholm, lítilli eyju við strendur Danmerkur þar sem keramikhefðin á sér djúpar rætur.
Í myndbandinu er skyggnst inn í líf og starf hjá einum virtasta keramiker í Danmörku. Fylgst er með daglegu lífi hennar; Þegar hún nær sér í leir við ströndina, sem hún notar í glerungana sína, hvernig hún vinnur leirinn á vinnustofunni sinni og að lokum hvernig hún brennir hann. Anne Mette notar sérstaka brennsluaðferð eða viðarofna sem hún þarf að vakta og kynda með timbri. Fróðlegt er að hlusta á hana segja frá hvernig leirhluturinn umbreytist í eldinum, t.d. hvernig staðsetning hans í ofninum hefur áhrif á útkomuna og hvað gerist þegar salti er komið fyrir inni í rauðglóandi ofninum.
Hún stiklar jafnframt á stóru um sögu leirlistar í Bornholm og hvernig sagan hefur haft áhrif á farveg hennar sem keramikers, ásamt náttúrunni sem umlykur eyjuna. Hlutirnir hennar bera vott um tignarleika og hægt er skynja frumkrafta náttúrunnar í gegnum þá, þar sem höfuðskepnurnar fjórar mætast jörð, vatn, loft og eldur.
Heimasíða Anne Mette Hjortshøjer er HÉR
Heimild: Goldmark gallery
Myndbandið:
Þóra er keramikhönnuður og starfar sem slíkur á vinnustofu sinni í Hafnarfirði ásamt pistlaskrifum og kennslu. Þóra reynir að tileinka sér umhverfisvæna mannasiði á sem flestum sviðum og notar t.d. sem náttúrulegust hráefni í hönnun sína. Hún hefur tekið þátt í fjölda sýninga bæði hér heima og ytra ásamt því að hafa komið að rekstri tengdum heilsu og hönnun.
