Íslenska framleiðslufyrirtækið Sagafilm hefur selt formatið að raunveruleikaþættinum Hannað fyrir Ísland út fyrir landsteinana. Formatið heitir Hannað fyrir… (Design For…) og hefur verið gengið frá samningum um að framleiða þáttinn í Írlandi, Bretlandi, Svíþjóð, Danmörku, Noregi og Finnlandi.

Þegar talað eru um format er átt við þætti sem eru með fyrirfram ákveðna uppbyggingu óháð því hvar þeir eru búnir til í heiminum. Sem dæmi um format-þætti eru Idol, X Factor og MasterChef.

Verða meðframleiðendur

Er þetta í fyrsta sinn sem Sagafilm selur format að íslensku skemmtiefni til annarra landa. Þá er ekki verið að selja þættina sjálfa heldur uppskriftina að þeim sem Sagafilm á heiðurinn af ásamt fyrirtækinu 66°Norður. Sagafilm mun verða meðframleiðandi í bresku, írsku og sænsku útgáfunni af þáttunum.

Ótrúlega vinsæll þáttur

Hannað fyrir Ísland hefur verið afar vel tekið á erlendri grundu og var þátturinn meðal annars tilnefndur í tveimur flokkum á format-verðlaunahátíðinni C21 Media International Format Awards í fyrra. Fyrir þá sem ekki hafa séð þáttinn, þá snýst þetta um að íslenskir hönnuðir fá að spreyta sig og nýta reynslu sína í að hanna bestu útivistarflíkur sem völ er á. Þátturinn var unninn í samstarfi við 66°Norður en rík áhersla var lögð á notagildi fatnaðarins ásamt því að nýtískulegt útlit var haft að leiðarljósi.

Níu hönnuðir hófu keppni í þættinum en að lokum stóð einn uppi sem sigurvegari – hin hæfileikaríka Birta Ísólfsdóttir.

Hafa þróað íslensk formöt

Sagafilm er stærsta sjálfstæða framleiðslufyrirtæki landsins á sviði sjónvarpsþáttagerðar, sjónvarpsauglýsinga, kvikmyndagerðar, viðburða og efnis fyrir nýmiðla. Sagafilm er eina framleiðslufyrirtækið í íslenskum afþreyingariðnaði sem hefur reynslu af því að framleiða svonefnda format-þætti fyrir heimamarkaðinn. Meðal alþjóðlegra formata, sem framleidd hafa verið fyrir íslensku sjónvarpsstöðvarnar, eru WipeOut, X Factor, Idol-Stjörnuleit og MasterChef. Þá hefur Sagafilm einnig þróað íslensk formöt eins og Dans Dans Dans og Hæfileikakeppni Íslands.

 

SHARE