Í gær var ekið á kind og tvö lömb í Kolfgrafarvík í Árneshreppi á Ströndum. Aðkoman að þessu slysi var hrikaleg að sögn Þorsteins Guðmundssonar, bónda á Finnbogastöðum.
Kindin hefur dregist um 20 metra undir bílnum og keyrði manneskjan líka á bæði lömbin, það voru engin merki um að viðkomandi hefði reynt að bremsa. Ég held ég hafi aldrei séð eins slæmt slys, og það sem mér finnst allra verst er að manneskjan hafi ekki gefið sig fram
Þorsteinn bætir því við að bændur vilji fá að vita af svona slysum svo hægt sé að bregðast við:
Slys geta alltaf gerst og maður vill fá að vita þegar er keyrt á dýrin svo við getum tilkynnt tryggingunum þetta til að fá tjónið bætt
Þess má geta að þegar Þorsteinn kom á slysstað hafði kindin ekki verið tekin af veginum heldur bara verið keyrt í burtu og allt skilið eftir.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
