Ég sagði frá því hér fyrir skemmmstu að ég var að flytja í nýja íbúð og það er ótrúlega gaman að geta græjað og breytt öllu eftir sínu eigin höfði. Eitt af því sem ég er búin að gera er að hvítta tengla og rofa (passa að hafa þetta orð hérna núna, ekki slökkvara). Annað sem ég gerði var að gefa flísunum í eldhúsinu smá andlitslyftingu. Þær voru svona rauðbrúnar/yrjóttar og á móti eru þær svona fjólu/grá yrjóttar á gólfinu og mér fannst það einfaldlega of mikið.
Ég fór því á stúfana og renndi niður í Húsasmiðju. Þar talaði ég við mann í málningardeildinni og hann ráðlagði mér hvað ég ætti að kaupa og hvernig ég ætti að fara að því að gera þessar flísar meira eftir mínu höfði.
Svona voru þær fyrir breytinguna:
Myndirnar á flísunum eru upphleyptar og ég hafði smá áhyggjur af því hvernig það kæmi út.
Það sem ég þurfti að gera var eftirfarandi:
1. Ég þreif flísarnar með þessu efni sem heitir Speedball. Það leysir upp fitu og óhreinindi svo flísarnar séu móttækilegri við málningunni sem á að fara á þær.
Auðvitað er hægt að nota hvaða efni sem er sem leysir upp fitu en mér finnst Speedball algjört æði.
2. Eftir þrifin á flísunum, sem tóku enga stund, spreyjaði á og þurrkaði yfir, þá tók ég fram aðalgræjurnar. Tile paint, pensill, lítil málningarrúlla og lítill málningarbakki. Prikið fylgdi með og gríman var nú bara meira upp á grínið.
3. Passið að hræra vel í málningunni áður en byrjað er að mála
4. Notið pensilinn til að mála fúguna og kantana. Notið málningalímband til að mála ekki út fyrir á innréttinguna
5. Ég er bara nokkuð sátt við útkomuna og þetta tók alls ekki langan tíma og kostaði alls ekki mikið.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
