Æðisleg frönsk súkkulaðikaka með hnetusmjörskremi

Þessi æðislega uppskrift er fengin af sælkerablogginu hennar Erlu Guðmunds. Flestir hafa nú bakað hefðbunda franska súkkulaðiköku en það er alltaf gaman að breyta aðeins til og prófa eitthvað nýtt. Eins og þetta krem, mmm, það hljómar alveg stórkostlega.

Sjá einnig: Hveitilaus frönsk súkkulaðikaka

img_20150903_213030

Frönsk súkkulaðikaka með hnetusmjörskremi

Botn

  • 4 stk egg
  • 2 dl sykur

Þetta er þeytt vel saman þar til þetta er orðið svolítið ,,fluffy“.

  • 200 gr íslenskt smjör
  • 200 gr súkkulaði
  • 1 dl hveiti

Smjörinu og súkkulaðinu er skellt saman í pott og brætt saman við vægan hita. Þessari blöndu er síðan hellt varlega út í eggja- og sykurblönduna. Seinast er hveitinu svo bætt við. Kakan er svo bökuð við 175° í ca. 25min. Gott að stinga gaffli í miðjuna þegar að 20 min eru liðnar til þess að athuga hvort hún sé klár.

Hnetusmjörskrem:

  • 250 gr íslenskt smjör
  • 1 egg
  • 4 msk flórsykur
  • 1 tsk vanillusykur
  • 3 msk hnetusmjör

Byrjið á því að hræra smjörið, næst er egginu bætt út í og þetta látið blandast vel saman. Ég sigta síðan flórsykurinn og vanillusykurinn út í og seinast set ég hnetusmjörið.

Hnetusmjörskreminu er síðan bara skellt ofan á kökuna. Ég skar síðan 3 Snickers, frekar gróft, og dreifði yfir kökuna. Til að toppa sætindin þá bræddi ég Góu karamellukúlur í potti með smá rjóma og sletti yfir kökuna.

Mæli klárlega með þessari, hún er einu númeri of góð.

SHARE