Ég rakst á þessa stórgóðu hugmynd á einhverju ferðalagi um internetið fyrir ekki svo löngu. Eggjakaka í vöfflujárni – ó, hvílík hugmynd, hvílík snilld. Ekki skemmir fyrir að kakan er klár til átu á núll einni. Eða svo gott sem. Það eina sem þú þarft er sjóðheitt vöfflujárn og góð eggjablanda.
Sjá einnig: Guðdómlega gómsætar vöfflur með vanilluís, rjóma & Rommýsúkkulaðisósu
Eggjakaka í vöfflujárni
2 egg
mjólk til þess að þynna
krydd að eigin vali (ég nota oregano, steinselju, salt og svartan pipar)
2-3 brytjaðar skinkusneiðar
1/4 rauðlaukur
Að sjálfsögðu má nota bara það sem hugurinn girnist – hvort sem um er að ræða hráefni eða krydd.
Hitum Rommelsbacher-inn vel upp.
Hrærum eggjablönduna vandlega saman og hellum henni í heitt járnið.
Innan við mínútu síðar, voilá – allt klárt. Hrikalega góð ommiletta, bæði stökk og djúsí.
Algjör snilld – mæli með því að þú prófir.
Sjá einnig: Brjálæðislega góðar vöfflur með vanilluís og Bingókúlusósu
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
