Heimatilbúið quesadillas

Quesadillas er smáréttur frá Mexíkó sem er vinæll og auðvelt að útbúa.

Quesadillas er upplagt að útbúa sem snakk í útileguna, sumarbústaðnum eða heima. Það sem þarf í réttinn eru tortillur, ostur og álegg eftir smekk. Bæði grænmeti og kjöt er hægt að nota sem fyllingu í quesadillas ásamt osti og hrísgrjónum, allt eftir smekk hvers og eins.

Fyllingin í þessari er brokkolí, sveppir, paprika, ostur og hrísgrjón. Grænmetið svissaði ég á pönnu.
Nauðsynlegt er að hafa salsasósu, gríska jógúrt og guacamole sem meðlæti og best er að útbúa bæði salsasósuna og guacamole-ið sjálfur, ásamt tortilla pönnukökunum.

Uppskriftin er miðuð fyrir 4-5

Tortilla pönnukökur 

2 dl Heitt vatn
4 dl fínt spelt
1 msk ólífuolía
Smá salt

Setjið allt saman í skál og hnoðið þar til að festist ekki lengur við skálina. Þá er deiginu skipt niður í 5 hluta og hver hluti flattur út á hveiti sem stráð hefur verið yfir borðið, reynt er að hafa pönnukökurnar sem þynnstar.  Best er að steikja þær síðan jafnóðum á vel heitri pönnu í ca. 1-2 mín á hvorri hlið, eða þar til þær hafa tekið lit. Geymið pönnukökurnar undir rökum klút og í plasti á meðan þið útbúið annað, þá haldast þær mjúkar og fínar. Síðan er gott að hita þær upp á pönnu með bræddum osti áður en fyllingin er sett á milli.

Salsasósa

1 tómatur
1/2 laukur
½ avocado
1 hvítlauksrif
nokkur lauf af ferskri basiliku
2 msk tómatmauk frá Rapunzel
1 msk sítrónusafi
1 msk Dijon sinnep
3 msk ólífuolía
Salt og pipar eftir smekk

Allt sett í matvinnsluvél og látið standa inni í ískáp í góða stund áður en borið er fram. Til að gera sósuna sterkari er hægt að bæta örlitlu af chilli út í.

Guacamole
2 stór og þroskuð Avacado
½ laukur
1  tómatur
4 hvítlauksrif, tvö fyrir þá sem vilja ekki eins sterkt hvítlauksbragð.
½ sítróna
1 tsk salt

Skerið avacado-in þversum, notið skeið til að ná steininum úr, skafið innan úr og setjið í matvinnsluvél. Pressið 4 hvítlauksrif út í, kreistið hálfa sítrónu yfir og stráið salti eftir smekk.

Verði ykkur að góðu.